අධ්‍යාපනයේ සියලු තනතුරු සුදුස්සන්ට හිමිවිය යුතුයි - අධ්‍යාපන අමාත්‍ය අකිල විරාජ් කාරියවසම් මහතා

kulඅධ්‍යාපන පද්ධතිය දේශපාලනයෙන් මුදා ගත යුතු බවත්, අධ්‍යාපනයේ සියලු පත් කිරීම් සුදුස්සන්ටම ලබාදීම තම ප්‍රතිපත්තිය බවත් අධ්‍යාපන අමාත්‍ය අකිල විරාජ් කාරියවසම් මහතා පවසයි. අමාත්‍යවරයා මේ අදහස් පළ කළේ “ළඟම පාසල හොඳම පාසල” වැඩසටහන යටතේ ඉදිකළ ගිරිඋල්ල රත්නාලංකාර මහා විද්‍යාලයේ ද්විතීයික කණිෂ්ඨ විද්‍යාගාරය සහ ප්‍රාථමික ඉගෙනුම් සම්පත් මධ්‍යස්ථානය සිසු අයිතියට පත් කිරීමේ අවස්ථාවට එක්වෙමිනි. මේ සඳහා වැය කර ඇති මුදල මිලියන 35 කට ආසන්නය.

මෙහිදී වැඩිදුරටත් අදහස් දැක්වූ අධ්‍යාපන අමාත්‍ය අකිල විරාජ් කාරියවසම් මහතා පැවසූවේ විදුහල්පතිවරුන්, ගුරුවරුන් ඇතුලු අධ්‍යාපනයේ කිසිදු තනතුරකට දේශපාලන අතපෙවීම් නොකිරීම මගින් අධ්‍යාපනයේ ගුණාත්මක බව ආරක්ෂා කිරීමට හැකියාව ලැබී ඇති බවයි.

විශේෂයෙන්ම විදුහල්පතිවරුන්ගේ පුහුණුව සහ ගුණාත්මක සංවර්ධනය වෙනුවෙන් වැඩසටහන් රැසක් දියත් කර ඇති බව සිහිපත් කළ අමාත්‍යවරයා විදුහල්පතිවරුන් 1000 කට ආසන්න පිරිසකට මේ වනවිට විදෙස් පුහුණු අවස්ථා උදාකර ඇති බව ද සඳහන් කළේය.

ගතවූ වසර 4 ක කාලය තුළ කිසිදු නුසුදුසු ගුරුවරයෙකු අධ්‍යාපන පද්ධතියට ඇතුළත් කර නොගත් බව පෙන්වා දුන් අමාත්‍යවරයා විද්‍යාපීඨ බඳවා ගැනීම් දෙගුණ කිරීම සඳහා නේවාසිකාගාර ඇතුලු පහසුකම් සංවර්ධනය කර ඇති‍ අයුරු ද සඳහන් කළේය.

උපාධිධාරීන් 5,000 කට ගුරු පත්වීම්

උපාධිධාරීන් 20,000 කට රැකියා ලබාදීමේ රජයේ වැඩපිළිවෙල යටතේ උපාධිධාරීන් 5,000 ක් ගුරුවරුන් ලෙස බඳවා ගැනීම සඳහා අවශ්‍ය පියවර ගන්නා බව ද පැවසූ අධ්‍යාපන අමාත්‍යවරයා ජාතික පාසල් සඳහා තවත් ගුරුවරුන් 3,500 ක් බඳවා ගැනීමට අදාළ කැබිනට් පත්‍රිකාව යොමු කර ඇති බව ද සඳහන් කළේය.

ඉදිරියේ දී ප්‍රාථමික සහ ද්විතීයික ශ්‍රේණිවල දරුවන්ට ද ටැබ්

උසස් පෙළ හදාරන සිසුන්ට සහ ඉගැන්වීම් සිදු කරන ගුරුවරුන්ට මෙම වසරේ දී කෙසේ හෝ ටැබ් පරිගණක ලබාදීමට පියවර ගන්නා බව පැවසූ අමාත්‍යවරයා, අනාගතයේ දී පහළ ශ්‍රේණිවල දරුවන්ට ද ටැබ් පරිගණක යොදා ගනිමින් අධ්‍යයන කටයුතු කිරීමට ද සිදුවනු ඇති බව ද සඳහන් කළේය.

මීට අමතරව ගිරිඋල්ල කලාපයට අයත් කඩහපොල මහා විද්‍යාලය, පොල්ගහයාය මුස්ලිම් ම.වි., මැටියගනේ ම.වි., පරනගම ප්‍රා.වි,බෝයවලාන ම.වි, වෑවල ප්‍රා.වි., වෙන්නරුව විජයබා මහා විද්‍යාලයේ ඉදිකිරීම් නිමකර ඇති ප්‍රාථමික ඉගෙනුම් සම්පත් මධ්‍යස්ථාන විවෘත කිරීම් ද ගරු අමාත්‍යවරයා අතින් සිදු කෙරුණි.

මෙම අවස්ථාවට දඹදෙණිය ආසන සංවිධායක රූකාන්ත ගුණතිලක මහතා ද එක්ව සිටියේය.