Latest News

min

පෙළපොත් බෙදාහැරීම පාසල් නිවාඩුවට පෙර අවසන් කරන ලෙස නිලධාරීන්ට උපදෙස්

පාසල් සිසුන් වෙත ලබා දෙන පෙළ පොත් බෙදාහැරීමේ කටයුතු පසුගිය දින 50 නීති විරෝධී ආණ්ඩුවේ ක්‍රියාකලාපය හේතුවෙන් අඩාල වී තිබූ බවට චෝදනා එල්ල විය.

අධ්‍යාපන අමාත්‍යවරයාගේ පණිවිඩයක් පෙළපොත්වල අන්තර්ගතව ඇතැයි පවසමින් පෙළපොත් බෙදාහැරීම ප්‍රමාද කිරීමක් සිදුව ඇති බව සහ මුද්‍රණය කිරීමට නියමිතව තිබූ පෙළපොත්වල පණිවිඩ ඉවත් කිරීමට ලබා දී තිබූ උපදෙස් හේතුවෙන් පෙළපොත් සිසුන් අතට පත්කිරීම ප්‍රමාද වූ බවත් මාධ්‍ය වාර්තා පළ වී තිබුනි.

කෙසේ වෙතත් අධ්‍යාපන අමාත්‍ය අකිල විරාජ් කාරියවසම් මහතා පාසල් ආරම්භ කරන විට සිසුන්ට අවශ්‍ය පෙළ පොත් ලබාදීමට පියවර ගන්නා ලෙස උපදෙස් ලබාදුන් අතර සම්ප්‍රදායානුකූලව පාසල් පෙළ පොත්වල අන්තර්ගත වූ අධ්‍යාපන අමාත්‍යවරයාගේ පණිවිඩය නීතිවිරෝධිව බලයට පත් වූ ආණ්ඩුවේ දේශපාලන අධීකාරීන් විසින් ප්‍රතික්ෂේප කිරීම පිළිබද කණගාටුව ප්‍රකාශ කළේය.

අධ්‍යාපනයේ උන්නතිය වෙනුවෙන් තමා සැමවිටම ජාතික ප්‍රතිපත්ති මත පිහිටා කටයුතු කළ බවත් කිසි විටෙකත් තමා පාසල් දරුවන්ගේ අධ්‍යාපනය සමග දේශපාලනය පටලවා නොගත් බවත් අවධාරණය කළ අධ්‍යාපන අමාත්‍ය නීතිඥ අකිල විරාජ් කාරියවසම් මහතා පාසල් අධ්‍යාපනයේ උන්නතිය වෙනුවෙන් ආරම්භ කළ සියලු වැඩසටහන් සක්‍රීය කිරීමට පියවර ගන්නා බව ද අවධාරණය කළේය.

සුරක්ෂා සිසු රක්ෂණාවරණය, ළගම පාසල හොදම පාසල වැඩසටහන, 13 වසරක සහතික කළ අධ්‍යාපන වැඩසටහන ආදී වැඩසටහන් රැසක් මේ වන විට අඩාල වී ඇති බවත් වහාම ඒවා යථා තත්වයට පත් කර ක්‍රියාත්මක කිරීමට පියවර ගන්නා ලෙසත් අමාත්‍යවරයා නිලධාරීන්ට උපදෙස් ලබාදුන්නේය.

අධ්‍යාපන අමාත්‍ය අකිල විරාජ් කාරියවසම් මහතා අධ්‍යාපන අමාත්‍යාංශයේ රාජකාරි ආරම්භ කිරීමෙන් පසු මාධ්‍ය වෙත සිදුකරන ලද විශේෂ ප්‍රකාශය මේ සමග යොමුකිරීමට කටයුතු කර ඇත.

minister

පසුගිය දින 50 ගැන අධ්‍යාපන අමාත්‍යාංශයේ නිලධාරීන්ගෙන් වාර්තාවක් කැඳවයි

නීති විරෝධි ලෙස බලයට පත් වූ ආණ්ඩුව විසින් පසුගිය දින 50 ක පාලන කාලය තුළ අධ්‍යාපන අමාත්‍යාංශයේ සිදු කළ ක්‍රියාකාරකම් පිළිබද වාර්තාවක් කැදවීමට අධ්‍යාපන අමාත්‍යවරයා පියවර ගෙන තිබේ.

ඒ චක්‍රලේඛ උල්ලංඝනය කරමින් පාසල්වලට ළමුන් ඇතුළත් කිරීම, ගුරු මාරු සිදුකිරීම ඇතුළු කරුණු කිහිපයක් පිළිබද අවධානය යොමුකරමිනි.

පාසල් නිල ඇදුම් වවුචර පාසල් නිවාඩුව අවසන්වීමට පෙර පාසල් වෙත යොමුකිරීමට නිලධාරීන්ට උපදෙස්.

වවුචරයේ වලංගු කාලසීමාව පෙබරවාරි 28 දක්වා දීර්ඝ කිරීමට පියවර

Read more ...

ak1

අධ්‍යාපන අමාත්‍ය අකිල විරාජ් කාරියවසම් මහතා සිය ධුරයෙහි වැඩ අරඹයි

අධ්‍යාපන අමාත්‍ය අකිල විරාජ් කාරියවසම් මහතා අද (21) යළිත් සිය අධ්‍යාපන අමාත්‍යධුරයෙහි වැඩභාරගත් අතර, එම නිල උත්සවය පෙරවරුවේ අධ්‍යාපන අමාත්‍යාංශ පරිශ්‍රයේ දී පැවැත්වුණි.

රටේ අධ්‍යාපන පද්ධතිය තුළ විප්ලවීය වෙනසක් ආරම්භ කර ක්‍රියාවට නැංවෙමින් පැවතිය දී මතු වූ නීතිවිරෝධී දේශපාලන වෙනස්කම් හේතුවෙන් පසුගිය දින පනහකට අධික කාලය පුරා එම කටයුතු අඛණ්ඩව ක්‍රියාවට නැංවීමට නොහැකිවීම ගැන කනගාටුවට පත්වන බවත්, රටේ දරුවන්ට වඩාත් ගුණාත්මක අධ්‍යාපනයක් ලබාදීම අරමුණු කරගනිමින් ක්‍රියාත්මක කරන ලද, 13 වසරක අධ්‍යාපන වැඩසටහන, සුරක්ෂා රක්ෂණ වැඩසටහන, ළඟම පාසල හොඳම පාසල වැඩසටහන ඇතුළු සාධනීය සංවර්ධන වැඩසටහන් නැවතත් බලාත්මක කරන බවත් අමාත්‍ය අකිල විරාජ් කාරියවසම් මහතා මෙහි දී ප්‍රකාශ කළේය.

Read more ...

notice

ජනපති ප්‍රධානත්වයෙන් පැවැත්විමට නියමිතව තිබූ ප්‍රාචීන පණ්ඩිත උපාධි ප්‍රදානෝත්සවය 2019 ජනවාරි තෙක් කල් යයි.

2018 ‍දෙසැම්බර් 13 වැනි දින අතිගරු ජනාධිපති මෛත්‍රීපාල සිරිසේන මැතිතුමන්ගේ ප්‍රධානත්වයෙන් කොළඹ, නෙළුම් පොකුණ රගහලේදී පැවැත්වීමට නියමිතව තිබූ ප්‍රාචීන පණ්ඩිත උපාධි ප්‍රදානෝත්සවය 2019 ජනවාරි දක්වා කල් දමා ඇත.

වැඩි විස්තර අධ්‍යාපන අමාත්‍යාංශයේ ශ්‍රී ගංකා ප්‍රාචීන භාෂෝපකාර සමාගම විසින් අදාළ උපාධිලාභීන් වෙත ලිපි මලින් දැනුම් දීමට කටයුතු යොදා තිබේ.